قادو قادو سلطه تلع لع القلب |Indonesian salad| artos

Hi~


شلونكم حبيبات آلبي ,, وحشتوني خيرااات الله .


alt




طبقنا هالمرهـ عجيب غريب , وأول مرهـ يعرض بكل أبو الأنترنت بالطريقه إللي راح أعرضها , من القلب إلى القلب .


<== الأخت بواب على مواضيع الأنترنت , تقول لأول مره ,, صدق متأكده ماسبق وعرض بالخطوات والتفصيل لأني كنت أموت عليه , و أخيراً تعرفت عليه هههههههههه ..


المهمز , طبقنا اليوم أندونيسي محض ..


يؤكل كسلطه بجميع الدول , بس الأندونيسين يشوفنه وجبه متكامله , وهم صادقين وجبه متكامله فيها الكربوهيدات , والبروتينات , والخضروات , وحتى المكسرات .. يعني ماخلوا شيء .



شخصياً منب من هواة الأكل الآسيوي , يعني لاجابو لي طاري ربيان , طاري قواقع وأستكواز أو أكل صيني أو ياباني , تجيني القشعريره , تكرم النعمه ماأحبه ولا أستهضمه ,, وأحس أكلهم خالي من النكهه ومثل ماتعرفوني أحب الـ Action



بس هالقادو قادو مهوب هين , غير نظرتي بالأكل الآسيوي 180 درجه ..



ترى أنا منب راعية أندومي , إللي ببيتنا ياكل أندومي نقاطعه لووووووووول , لأني أخوي الكبير تجيه هفات ويقول مشتهي أندومي

أنا و أختي نقب عليه نقول على بالك ذا أكل , وقسم مهوب أكل صحي ومضر وبرابير واجد { بأختصار مانحبه , لاتزعلون علي ترى حتى أخوي أتهاوش معاه على هالأندومي } ..



نرجع حق محور حديثنا , أول مره تعرفت على محسوبكم قادو قادو كنت بصف أولى متوسط , عند صديقة عمتي <== ياحبها للهذرهـ


صديقة عمتي ياحبي لها طاقه صحبه هي والشغاله , تأمر وتنهي وتتحكم وإلا ذاك اليوم تبي تأكلنا بالغصب قادو قادو ..



المهم يومني بزر , ماعلي وش يقدمون ولا وش ياكلون , بس أول ماقدم لفتني وحبيته وجلست آكل منه ودغيت دغ ,, وكانت ميزته أنه مشطشط ,, حار من قلب ..


عاد عمتي ياحبي لها مالها في الطبخ لا من قريب ولا من بعيد , عدت السالفه وكبرت وقلت لعمتي جيبي الطريقه ..

ياحليلها تقولي كله مسلوق وبس , وحطي صلصه وأنتهينا بجد مافهمت شيء , أمي تضحك هههههههههه تقول تبين وصف لاتاخذينه من عمتك ,, بتضيعك ..


المهم أقول لأختي مشتهيه قادو قادو { أختي عندها عقدة الأندومي } تقول ياويلك يدخل البيت , ياويلك لو تسوينه , ياويلك وياويلك ,, bla bla bla ..... وكثر وعيدها وتهديدها كأني بتسمم لو أكلته لووووووووول .


المهم بجنب المطعم الهندي مكاني بشارع الدشوش , فيه بجنبهم مطعم أندونيسي قلت لأختي خلينا نروحه عشان أطعم هالقادو قادو وأجيب الوصفه صح ,, ودخلت أنا وهي ماعجبنا المطعم مااااش بجد بجد مدري شلون البلديه مخليينه فاتح لحد اليوم , قذر لأبعد درجه .. وأستمر تهديد أختي لوووووووووول .


المهم طنشت وجبت الوصفه من صديقة عمتي ,, ولاجازت لي الوصفه ,, جلست أحورف فيها لين ماناسبت ذائقتي , أنا سنه أولى أندونيسي مستحيل أتقبل أي نكهه ..


بل بل بل , وش كتبت بدون ماأحس عدتني شـمــــوخ { مو تزعلين علي أدري أني أمون أصلاً الكلام يونس } .




تنويه :

هالوصفه مفاعل نوووي بحق وحقيقي , بس بما أني أقدر الفلفل لازم تعرفون أن هالفلفل هو إللي معطيها اللذاذهـ ..


لاتطبون ببطني لاشفتوا كمية الفلفل , زيدوها أو قللوها حسب ذوقكم , بس يفضل تكون تلع لع ولو قليلاً .


طبعاً الفلفل يعتبر مثل الآسبرين للقلب , ممتاز لمرضى السكري , ممتاز لتنظيف المعدهـ بعد ههههههه .


وكلام كثير ,, بس الزبدهـ أن الفلفل زين كثروا منه ,, ويبيله بطن حديديه مو بعدين تقولون جانا القولون منك , ولا سببتي لنا قرحه { متعقده من أهل بيتها لوووووووووووول } .



بسم الله نبدأ }


الوصفه طويله حبتين بس بالحيل سهله , وهي دايت لولا الصوص إللي فيها لذلك أهديه لحبيبة قلبي الدموووعه , بس لاتكثرين صوص .



مقادير الصوص~


هو إللي يعطي الوصفه التميز ..من غيره بتكون الوصفه مجرد خضار .



alt


6 ملاعق صغيره زبدة الفول السوداني

{ البعض يحمس فول سوداني كامل بقليل من الزيت من ثم يطحنه ولكن ماأفضل هالطريقه أبداً , بس هي الطريقه التقليديه}



8 ملاعق كبيرهـ حليب جوز الهند السائل

{ البعض يستخدم البودره بس أنا ماأحب طعمه ,, السائل أفضل نكهته أغنى }


ملعقه صغيره صويا صوص

ملعقه صغيره صلصه حلوه حاره (سومطره)

ملعقه صغيره معجون طماطم

ملعقه صغيره سكر أسمر

ملعقه صغيره ملح صيني ( جيني مو تو )

فصين صغار ثوم مدقوق

بصلتين صغار مفرومه فرماً ناعماً

عصير ليمونه

ذرة ملح عادي


6 عروق فلفل أحمر + 8 عروق فلفل أخضر

{ أختياري يابنوتات لأن الصوص مره قليل , أخاف تتفجر بطونكم لوووووول }


قليل جداً جداً من الزيت للتحمير .


قليل جداً من الماء لمساعدتك بالخلط ( أستخدمت 8 ملاعق من الماء )



الطريقه ~


ضعي قليل من الزيت بقدر صغير ثم أضيفي البصل وقلبيه حتى يذبل على نار هادئه ..


alt


لاحظوا شلون ذبل البصل مانبيه يكون واضح بالصوص بشكل مزري , من ثم ندق الثوم مع أضافة الملح العادي , ونضيف للبصل




في الخلاط نظيف باقي مكونات الصوص ماعادا الليمون , ونخلط


alt






نضيف الخليط للبصل والثوم , ونتسمر بالتقليب حتى يتماسك قليلاً , ترى الخليط فيه سكر يعني بسرعه يحترق قلبي بشكل سريع وحاولي تحافظين على سيولة الصوص .


alt


الصوص ماراح ياخذ وقت كثير عالنار مجرد مايتسخن ونحس بحرارته نرفعه من النار .





نضيف الليمون ~


alt


لاحظوا مانضيف الليمون مع الصوص وهو عالنار عشان لايعطيه مراره , بالأضافه إلى أن أضافتك لليمون كآخر خطوهـ تعطي تماسك عجيب للصوص , وتلاحظين أن لونه حتى يتغير .

وبكذا نكون أنتهينا من الصوص ..



مقادير السلطه ~




alt


الخضار المطبوخه }


الكميات تقديريه وترجع لذوقك ..

3 حبات كوسه مقطعه لأنصاف دوائر رفيعه

جزره كبيره مقطعه لأنصاف دوائر رفيعه

3 حبات بطاطس متوسطة الحجم

كوب فاصوليا خضراء مقطع لقطع صغيره

ربع حبة ملفوف حجمها صغير ..مقطع لقطع متوسطة الحجم



الخضار الفريش }

3 حبات خيار متوسطة الحجم مقطعه لأنصاف دوائر

8 أوراق خس مقطعه كما بالصوره <=== توهقت ماعرفت تشرحها




طريقة عمل الخضار ~


حسب الروقان والمزاج , مرات أصلحها خضار سوتيه ( أنضجها بالبخار مثل الصوره) , ومرات يطقني الكسل وأسلقها سلقاً وفي الحالتين لذيذه ماتفرق .


alt


العجازين يسلقونها كلها سوا , لذلك ماحبيت أكثر الطرق إللي قُدمت لي أو إللي جربتها , لأن نسبة نضج الخضار تختلف من خضار للثانيه ..

بالقادو قادو لازم تطبخين الخضار نص أستواء , مو تخلينها أيدام وتطبخينها لين تذبل وتموت , لأنها بتكون شينه للغايه كأنها أكل أطفال .


أولاً أبدأي بالفاصوليا , من ثم حطي فوقه الجزر والكوسا, ثم الملفوف مجرد مايبدأ يذبل شيليه

الوقت حسب نوعية الخضار إللي عندك , أهم شيء يكون نص أستواء ..




بالنسبه للبطاطس ,, أسلقه لوحده بعد ماأخزقه بالسكينه أو بشوكه وبقشره ..


alt


ليش صلحت هالطريقه ؟ عشان لا يعفس بقية الخضار ويخليها مليانه نشاء ,, إذا سلقتيها وهي مقشره بينزل النشاء بالماء وبتصير لزجه ( ستيكي ) .


ملاحظه:

البعض يفضل البطاطس مقلي , وأنا أفضله مقلي ولكن بقية أفراد المنزل يفضلونه مسلوق .. فطبخ بناء على رغبة الأغلبيه <=== مظلومه الأخت .



مقادير الأكسسوارات ~


راح نتكلم عن الكروبك للي مايعرفونه , عباره عن دقيق الأرز ودقيق الروبيان , وكم خربوط ثاني معهم ..

تلقونه بالبقالات الأندونيسيه , أنا شفته بالدانوب بس ماشريت منهم لأن ماعندهم النوعيات التقليديه .


كروبك روبياك سكورا


alt


هالكروبك يروع بشكل مو طبيعي ,, حلو بس مع القادو قادو , بس لو ذقتيه لحاله ماراح تستحملينه ,, خاصه وأنتِ تقلينه ريحته تفوح بشكل مرعب ,, كأن ربيانه تمشي بجنبك ..




كروبك ألوها سيدورجا حسب ماأشوف بالكرتون ترى ماأعرف أقرأ أندونيسي .



alt


هالنوع حلو وخطير , حتى ممكن آكله لحاله بدون قادو قادو كنوع من أنواع المقليات .. طعمه مثل سناك أبو كوره ؟؟ عرفتوا بنكهة الربيان ..

العجيب أني ماآكل ربيان , بس بهالطريقه ممكن آكل ربيان ..


المهم أختاري الكروبك الأقرب إلى قلبك وأستخدميه ..


كسري كل قطعه 4 قطع , وأقليه بزيت غزير { التعليمات موجوده خلف كرتونة الكروبك }


alt


لاحظوا القلايه فاضيه , لأنها راح تكبر وتنفش , وبس نزليها وحطيها على ورق ماص .




البصل ~

تقطعونه شرحات وتقلونه لين يحترق ويتكرمل


أو صلحيه بالطريقه الأندونيسيه }


قطعي بصله كبيره , وحطي عليها شوية صويا صوص , ذرة سكر أسمر , ذرة ملح ,ذرة ملح صيني ( جيني مو تو ) وشوية دقيق ..وأخلطيهم سوا


alt


وسريع سريع أقليهم على طول , على نار عاليه .. وزيت غزير نسبياً ممكن يتعبك أثناء القلي ويتشابك , حاولي تكونين حريصه .



ملاحظه ~

يزين دائماً طبق القادو قادو بالنودلز أو الأندومي , وأيضاً البيض المسلوق ..

أنا أستغنيت عن النودلز لأن محد يحط له نودلز إلا الأندونيسين التقليدين جداً جداً ,, وغير كذا قلت لكم ماأحبه لما ربي يفتحها علي بحطه لووووووووول .




طريقة تقديم القادو قادو ~

بصحن شبه عميق , ماتحطونه بصحن عميق <=== شوي وتعصب .


المهم نصف الجزر والكوسا والفاصوليا


alt


ثم نصف الملفوف , ومن فوقه البطاطس إذا كان مسلوق فقط , لو كان مقلي آخر شيء قبل الأكسسوارات طبعاً ..وبعد الصوص .



ثم نضيف الخيار والخس { بالطريقه التقليديه الخس والخيار تزين جوانب الصحن بس ماأحب هالطريقه أحب كل شيء يغرق بالصوص }


alt


نضيف الصوص فوق الخيار والخس , وراعي الصوص مايكون بارد مره ولا ساخن مره وسط .



البيض أحب نضجه مثل الصوره ماأحبه ناضج مره , ولكم الحريه .

alt


يزين بالكروبك , ثم البصل المقلي و البييض ( ودائماً هالخطوه آخر خطوه قبل التقديم بحيث لا يطرى البصل أو الكروبك و ينشف البيض )

ممكن يقدم الكروبك بصحن جانبي ,ويضاف حسب الرغبه.


الشكل النهائي ~


alt


وبالهناء والعافيه على قلوبكم alt,,,

 

أختي حبته وأدمنته , ياترى أنتم راح تحبونه !!!



التصنيف : مقبلات

اترك تعليقا :

التعليقات تحتاج لموافقة صاحب المدونة لنشرها.

كل الحقوق محفوظة ل مدونة اطباق الذواقه للطهي

استضافة مجانية من موقع مدونات عبر! | الموقع غير مسؤول عن محتويات المدونة، فقط صاحب المدونة يتحمل كامل المسؤولية عن مضامينها | التبليغ عن مخالفة | سياسة الخصوصية |نسخة الموبايل