بيبي كبه عالأصول , والفصول بالداخل |Baby Kebah | artos

Hi~



كل عام وأنتم بخير حبيبات آلبي <== أكيد تقولون بدري ..


alt



صراحة الكبه من أكثر الشغلات إللي أصلحها
بثرهـ بشكل مو طبيعي ,, يمر الوقت , تشرق الشمس وتغيب وأنا بعدني بالمطبخ أنا وهي }



وش إللي كالفني عليها , الله أعلم ... كذا أبي أسوي نفسي سنعه بالغصب لوووووول ..


أصلحها
مرهـ بالسنه ولا أكررها إلا السنه الجايه , مرهـ من المراريت صلحت 4 كيلو لحمه و 4 كيلو برغل ( مع المقاير بتعرفون أن هالكميه كميه مطاعم ) ,,




ظهري وأديني جلست تعورني أسبوع كامل

, وهالمرهـ كررتها لعيونكم ..


طبعاً الكبه تجيكم كبيرهـ كبر قريح , شخصياً أحب الكبه تكون
Baby Kebah , يعني تؤكل بلقمه وحدهـ


الكبه الكبيره كل من يشوفها من الحريم ويشوف حجمها يقولون
لا لا وش ذا منب ماكلتها ومتوهقه فيها , خاصه أن الكبه محشيه يعني حوسه وفتفته وقلق ..



بس الحق ينقال تبين
تكسرين ظهرك صلحي كبه صغيره , تبين ترتاحين كبري الكبه بتخلصين بثواني , على قولة أختي الكبه يبيلها نحات لوووول من كثر مانهتم بزواياها ..




مميزات الكبه الناجحه :

أحبها تكون
فاتحه مو بنيه , البعض تصير فاتحه لأنه يقلل كمية اللحمه , بس عاد فيني عناد لازم تصير فاتحه وكمية اللحمه مساويه لكمية البرغل


أحب قشرتها تكون
رقيقه وحشوتها كثيره ,ولاحظت أبغلب المطاعم أو الناس إللي أزورهم قشرة الكبه سميكه,,



وأيضاً أحبها تؤكل بلقمه وحده مثل ماذكرت تو ,, وغير كذا نكهتها تكون لاذعه بس مو طعمها يصير هندي مبهر , ولا ببهارات خليجيه ,,

لازم نحافظ على النكهه
الشاميه الأصيله ..


عاد الكبب منتشرهـ بـــ
{ لبنان , سوريا , فلسطين ,

العراق , الكويت }


بس طريقتي نكهتها أرتوسيه , وخطواتها دمشقيه لووووووووول


عاد أنا أخذت كل شيء يعجبني بكل
كبه ذقتها , ونسبتها لنفسي لوووووول ,,


طبعاً حبيبات قلبي , بشكل عام الكبب تتشابه بس التفصيل والدقه وتناسب الكميات هي إللي تفرق ,وهي إللي تأثر بالطعم بشكل
جذري .




سر الكبه الناجحه ~



النعومه ثم النعومه ثم النعومه ( الغلاف لازم يكون ناعم مثل العجين )


بالأضافه إلى
جودة المواد المستعمله , يعني اللحم يصير زين مهوب تخربطون باللحم , ولازم يكون لحمه هبرهـ ( خاليه من الشحم ) طبعاً مو بجميع أنواع الكبب بس بالكبب المقليه والكبه اللبنيه وكم نوع غيرها ..

لأن
الكبه المشويه تحتاج شحم قليلاً ..

المطاعم إللي جربتها ماتتقن الكبه نهائياً , يسترخصون أغلبهم بها ..فالكبه مكلفه شيء طبيعي يسترخصون بها ..




بسم الله نبدأ
}




مقادير عجينة الكبه ~



alt



كيلو لحم هبره خالي من الدهن مفروم فرم ناعم

كيلو
برغل ناعم ( يفضل أستخدام البرغل الأبيض مو الأسمر )

بصله كبيره

ملح

بهارات مشكله
{ ملعقه كبيره كمون , ملعقه صغيره فلفل أسود ,ملعقه صغيره هيل , ملعقه كبيره قرفه , ربع ملعقه صغيره جوزة الطيب } أو حسب ذوقك .




الطريقه
:



ينقع البرغل لمدة ربع ساعه , ثم يوضع بالمصفاه حتى تسهل تصفيته


alt




نأخذ كمشه من البرغل ونعصرها زين
بقبضة اليد , حتى نتأكد أنا تخلصنا من كميه كبيره من الماء .


alt


طبعاً نحتاج فرامة لحم كهربائيه , أستخدمت
أصغر حجم للفرم {عجانتي كينوود }





للأسف فقدت صور كثيرهـ تفصيليه وأتمنى أنكم تفهمون علي ..

المهم نبدأ بتقطيع
البصل شرحات ووضعه بالفرامه ( ممكن تخلطين البصل بس بالخلاط ) ..



alt





بعد فرم البصل , نفرم اللحم ( أحرصي تجيبينه من عند الجزار مفروم فرم ناعم وعلميه أنك تبينه فرم كبب ) البعض يرسل البرغل واللحم عند الجزار مره وحدهـ لأن هالعمليه مرهقه بالحيل ,,


خاصه أن اللحم ياحبيباتي بالغالب يكون فيه مثل الخيوط البيضاء هذي تجتمع بالفرم , فتسد
الفرامه فتضطرين بين فرمه والثانيه , تنظفين راس الفرامه عشان ينزل لك اللحم ..



بعدها ريحي المكينه , وأخلطي اللحم مع البصل مع أضافة البهارات المذكورهـ والملح ..أعجنيها ..




بعدها مباشره نكمل شغل بالماكينه ونفرم
البرغل , فرم البرغل أسهل من فرم اللحم سلس للغايه لأن مافيه أعصاب أو غيره يعيق عملية الفرم ..


alt


الآن أخلطي البرغل مع اللحم , لين تحسينهم صاروا عجينه
ناعمه , بتقولين ناعم وكفايه , بس أنصحك من جديد تفرمينهم سوا بالماكينه ,, راح تضمنين الفرم والخلط .. وبيكون متعب حبتين ,, بس بتضمنين }



عجينه ناعمه , عجينه ماتتفتت , أو تتفقع بالزيت أو حتى تشرب زيت ..


إللي تضيف بطاطس أو غيرهـ من دقيق وخرابيط , هذا نوع من الألتفاف بالوصفه يفقدها نكهتها الأصليه <=== شكلي عجيز أحب الأصلي .

وبكذا الحمدلله نكون خلصنا العجينه , أتركيها بالثلاجه لمدة ساعتين , بحيث تكون باردهـ وسهلة التشكيل ..


مقادير حشوة الكبه ~


alt


للتنبيه

أنا أحشيها كثير أبيها مربربه و بنت عز , فلي ماتبيها مربربه تصلح نصف هالكميه ..

كيلو لحم مفروم


كميه مساويه للحم بصل مفروم

{ أستخدمت من 8 إلى 9 حبات متوسطه}


أربع ملاعق سمن


كوبين صنوبر حباته صغيرهـ

{ أفضل الصنوبر السوري , الأيراني والباكستاني نسبة السكر إللي به عاليه فيحترق مع التحمير }


بهارات
{ ملعقتين كبار كمون , ملعقه كبيره قرفه ,ملعقه صغيره هيل ,ملعقه صغيره مكومه فلفل أسود }

ملح


ملاحظه }

حبيبات قلبي إللي تحب البهارات تكثرها بالحشوه , ولكن ماتكثرينها بالعجينه , راح تحترق بالزيت وتطلع ريحتها مو ok

والعجينه راح تصير معك سوداء ..




مقادير اللمعه ~


هذا سر صغيرون مايعرفه إلا أهل الشام راعيين الفناتك بس ,,

صلحت كميه بس صغيرهـ لأكلنا اليوم ,, لأن الكبه مثل ماتعرفون أفرزنها عشان رمضان ..


فص صغير مره مره ثوم


ملعقتين كبار دبس رمان { أحب الماركه إللي بالصورهـ }


ملعقه ونصف ماء


ملعقه ونصف زيت عادي أو زيت زيتون

قليل من الملح


بعدين بقولكم وش تزينون به ,, يفرق بطعم الكبه 50 % يعطيها لذاذهـ , خاصه للناس إللي يحبون الــ Action مثلي ,,




طريقة عمل الحشوهـ ~


نذوب السمنه بمقلاه , ونشوح الصنوبر حبتين لين يصير ذهبي , أرفعيه وخليه على جنب ..


alt

بنفس المقلاه , نضع البصل حتى يذبل ..




نضيف اللحم , وعلى طول نضيف الفلفل الأسود ( لأزالة رائحة الزفره) ونظل نقلب على نار عاليه حتى تنشف العصارهـ


alt


بعد ماتنشف العصاره نكمل إضافة بقية البهارات والملح .



نضيف الصنوبر , ونقلب اللحم ودايركت نطفي النار


alt


نبدأ نجهز مكوناتنا ,, ومن أهمها الماء البارد والثلج ,, ( عشان نبرد أدينا أثناء تشكيل الكبه وماتلزق العجينه بأدينا ) .


ودائماً إذا واجهتي مشكله بالتشكيل بلي أدينك بالماء البارد وكملي شغلك ..


أنا ماأنزل كل العجينه من الثلاجه , جزء جزء بحيث تحتفظ ببرودتها ولاتتعبني بالتشكيل ..



نكور العجين ( أنا أصلح كور كثيره بحيث يكونون بمقاس واحد ) .

يفترض تكون بحجم البيضه <== يقصدون بيض الدجاج


أنا أصلحه بحجم بيضة الحمامه لووووووووووووووول ,,أحبها مرهـ صغيره , صح تشكيلها صعب بس أطعم .



alt


حطي هالكوره براحة أدينك , وأفعصي من النص وأبدي تحفرين تحفرين , لين ماتشقين لك طريق لوووووووووووووول <== مو تصدقون تخرب الكبه كذا


لابس وأنتِ تحفرين ألزقي بالأطراف عشان تصير نحيفه , شلون أوصفها ذي ؟؟

المهم مسديها تمسيد , ولاتخلينها تلزق بكفك ,, شغلك سريع سريع .


أحشيها بالحشوهـ بواسطة ملعقه صغيره , إذا تبينها بيبي , أما إذا تبينها أمنا الغوله فأحشيها بمغرفه لوووووول


alt

شوفوا شلون تقفلونها !!! أبيها تصير كتكوته كذا

<=== تتشرط لوووووووووول



فيه ناس يحبونها مروسه أكثر وهي الأصل , وعاد بالشام يتفاخرون مين راسها أكبر من الثاني لووووووووووووول ..

لا بجد بجد يتفاخرون مين شكل راس كبتها أحلى من راس كبة جارتها ( ملكة جمال رؤوس الكبب ) ..

أحياناً ماأخليها مروسه من جهتين بس من جهه وحدهـ , أحسها تصير كيوت ,, <== ذابحها الكيوت .


المهم الشقى كله صلحته قبل رمضان , واليوم طلعتها من الفريزر قبل القلي بــ ساعه بحيث تذوب ,, وطش طااش قليتها ..


alt


حرارة النار 180 درجه .




alt


تقدم مع البطاطس , والزبادي بثوم مزين بالنعناع ..




alt


وهذي لحبيباتي الصايمات <=== تي تفطركم ..




alt


طيب لو جوك ضيوف ,, ونبي نقدمها بصواني , مالنا خلق لا زبادي ولا مايحزنون وش نزين ؟؟


ألحقوني بالسر }


راح يضفي نكهه وشكل , وطعم جُونااان .. عاد أنا طماعه أفضلها بزبادي وبالسر ..



alt


مقادير اللمعه تخلط سوا , ثم تدهن كل حبة كبه بها أو تغمس قبل الرص , قبل وقت التقديم ,,

يزيد من لمعتها ويعطيها أشراقه غير شكل ..


alt



فكرهـ أخرى للتقديم :

جيبي أناناسه , وأغرسيها بأعواد الشواء الخشبيه , وبكل عود حطي 4 حبات كبه , بعد ماتخلصين بتطلع معك شجرة كبه ,,

فعلياً شكلها يواجه , وأغلب محلات التقديمات بالمملكه يصلحون هالحركه ,, حطيها بصينيه وزيني صينيتك بمقبلات آخرى ..


أتمنى أكون أفدتكم ,,

هالموضوع من أنحس المواضيع ,, من رمضان 2008 وأنا أصور فيه وكل مرهـ تضيع الصور , واليوم ضاعت الصور فرجعت وعدت بعض الخطوات ,,

فشكلي الباقي راح أعطيه الجيران ~


دمتم بحب alt


 

التصنيف : مقبلات

اترك تعليقا :

التعليقات تحتاج لموافقة صاحب المدونة لنشرها.

كل الحقوق محفوظة ل مدونة اطباق الذواقه للطهي

استضافة مجانية من موقع مدونات عبر! | الموقع غير مسؤول عن محتويات المدونة، فقط صاحب المدونة يتحمل كامل المسؤولية عن مضامينها | التبليغ عن مخالفة | سياسة الخصوصية |نسخة الموبايل